محسن نقوی کی ایرانی صدر مسعود پزشکیان سے ملاقات، دوطرفہ تعاون بڑھانے پر زور

تہران(ڈیلی اردو) وفاقی وزیر داخلہ محسن نقوی نے ایران کے صدر مسعود پزشکیان سے ملاقات کی، جس میں پاکستان اور ایران کے باہمی تعلقات، معاشی تعاون اور خطے کی صورتحال سمیت مختلف اہم امور پر تبادلہ خیال کیا گیا۔

ایرانی صدر مسعود پزشکیان نے ملاقات کے دوران پاکستان اور ایران کے درمیان موجود صلاحیتوں کو مشترکہ طور پر بروئے کار لانے کی ضرورت پر زور دیتے ہوئے کہا کہ دونوں ممالک انسانی وسائل اور قدرتی وسائل سے مالا مال ہیں۔ ان کے مطابق باہمی تعاون کو فروغ دے کر دونوں ممالک اپنی ضروریات پوری کرنے کے ساتھ ساتھ علاقائی سطح پر بھی مشترکہ مواقع سے فائدہ اٹھا سکتے ہیں۔

مسعود پزشکیان نے حالیہ عرصے میں دونوں ممالک کے اعلیٰ حکام کے درمیان ہونے والے مسلسل رابطوں کو مثبت پیش رفت قرار دیتے ہوئے کہا کہ باہمی مشاورت اور اعلیٰ سطحی ملاقاتوں کا سلسلہ پاک ایران تعلقات کو مزید آگے بڑھانے میں معاون ثابت ہو سکتا ہے۔

ایرانی صدر نے تجارت، توانائی، سیاحت اور مشترکہ سرمایہ کاری سمیت مختلف شعبوں میں تعاون بڑھانے کی ضرورت پر بھی زور دیا۔ ان کا کہنا تھا کہ اقتصادی روابط میں آسانیاں پیدا کرنے اور مشترکہ منصوبوں کے دائرہ کار کو وسیع کرنے سے دونوں ہمسایہ ممالک کے تعلقات مزید مستحکم ہو سکتے ہیں۔

ملاقات میں وفاقی وزیر داخلہ محسن نقوی نے کہا کہ پاکستان ایران کے ساتھ اپنے برادرانہ تعلقات کو مزید مضبوط بنانے کے لیے سنجیدہ اور عملی اقدامات کا خواہاں ہے۔ انہوں نے تجارت اور معیشت کے علاوہ سیاحت، سیاست، ثقافت اور سائنس و ٹیکنالوجی کے شعبوں میں بھی دوطرفہ تعاون بڑھانے کی ضرورت پر زور دیا۔

محسن نقوی نے کہا کہ پاکستان ایران کے ساتھ مختلف شعبوں میں روابط کے فروغ اور باہمی تعاون کو وسعت دینے کے لیے تیار ہے، جبکہ دونوں ممالک کے درمیان موجود مواقع کو عملی شراکت داری میں تبدیل کرنے کی ضرورت ہے۔