پشاور میں ایف سی گاڑی پر خودکش حملے میں ملوث 3 مبینہ سہولت کار گرفتار

پشاور (نمائندہ ڈیلی اردو) پشاور کے علاقے حیات آباد میں ایف سی کی گاڑی پر ہونے والے خودکش حملے میں ملوث 3 سہولت کاروں کو گرفتار کرلیا گیا ہے۔

پولیس ذرائع کے مطابق حراست میں لیے گئے تین مشتبہ افراد سے پوچھ گچھ کی جا رہی ہے جبکہ سی سی ٹی وی اور دیگر شواہد کی روشنی میں کارروائی عمل میں لائی جارہی ہے۔

ذرائع کا کہنا ہےکہ خودکش حملہ آور سے متعلق تمام تفصیلات پولیس نے نادرا سے حاصل کرلی ہیں۔

واضح رہے کہ دو روز قبل پشاور کے علاقے حیات آباد فیز 6 میں بھی ایف سی کی گاڑی کے قریب خودکش دھماکے میں سکیورٹی فورسز کے دو اہلکار ہلاک اور 8 زخمی ہوئے تھے جبکہ اس سے قبل پشاور ریگی ماڈل ٹاؤن کے گیٹ پر مامور پولیس اہلکاروں پر فائرنگ کے واقعے میں دو پولیس اہلکار ہلاک جبکہ دو زخمی ہوئے تھے۔

خیال رہے خیبرپختوںخوا میں ایک بار پھر دہشت گردی کے حملوں میں اضافہ ہوا ہے۔ گزشتہ روز ضلع خیبر کے علاقے باڑہ بازار میں پولیس تھانے کے قریب خودکش دھماکہ ہوا تھا جس میں چار پولیس اہلکار ہلاک جبکہ 11 افراد زخمی ہوئے ہیں۔