کراچی میں رینجرز اہلکار کے ہلاکت میں ملوث کالعدم تنظیم کے شوٹر سمیت 3 دہشت گرد گرفتار

کراچی (ڈیلی اردو) کراچی کے علاقے لیاری میں رینجرز کے اہلکار کے ہلاکت میں ملوث مرکزی ملزم اور واردات کے شوٹر سمیت کالعدم تنظیم کے تین مبینہ دہشت گردوں کو گرفتار کرلیا گیا۔

سیکورٹی ذرائع کے مطابق رینجرز کے خفیہ ونگ کے عملے نے تکنیکی مہارت سے دو ملزمان کو کراچی کے علاقے بلدیہ ٹاؤن کے رئیس گوٹھ سے حراست میں لیا جن سے تفتیش کے بعد مرکزی ملزم کا سراغ لگایا گیا اور بلوچستان کے شہر آواران میں کارروائی کرکے مرکزی ملزم کو گرفتار کیا گیا۔

سکیورٹی ذرائع کے مطابق گرفتار ملزم نے موٹر سائیکل کی پچھلی سیٹ سے فائرنگ کرکے رینجرز کے اہلکار کو نشانہ بنایا، گرفتار ملزم آواران جبکہ دیگر دونوں زیر حراست دہشت گرد کراچی کے رہائشی ہیں، ملزمان بلوچستان کی کالعدم تنظیم بلوچ لبریشن فرنٹ سے تعلق رکھتے ہیں۔

کراچی میں لیاری الفلاح روڈ پر رینجرز چوکی کے قریب نامعلوم افراد کی فائرنگ سے سندھ رینجرز کا اہلکار ہلاک جبکہ ایک بچہ شدید زخمی ہوگیا۔#SindhRangers #Karachi

— Shabbir Hussain Turi (@ShabbirTuri) August 7, 2023

سکیورٹی ذرائع کا بتانا ہے کہ حساس ادارے کے اہلکار دلشاد کو لیاری کے علاقے بہار کالونی میں الفلاح روڈ پر 7 اگست کو فائرنگ کر کے ہلاک کیا گیا تھا اور ملزمان کی گرفتاری کیلئے ٹیمیں تشکیل دی گئی تھیں۔