بھارت کے زیرِ انتظام کشمیر میں کولگام اور اوڑی میں جھڑپیں، دو فوجی ہلاک

سرینگر (ڈیلی اردو) انڈیا کے زیرِ انتظام کشمیر میں سرینگر سے 101 کلومیٹر شمال میں لائن آف کنٹرول (ایل او سی) کے نزدیک اوڑی سیکٹر میں گزشتہ دو روز کے دوران فوج اور مبینہ مسلح دراندازوں کے درمیان جھڑپوں میں انڈین فوج کے دو اہلکار ہلاک ہو گئے۔

کشمیر میں قائم انڈین آرمی کی پندرہویں کور کے ترجمان نے سماجی رابطے کی ویب سائٹ ایکس پر ان ہلاکتوں کی تصدیق کی ہے۔ ترجمان کے مطابق، بدھ کو اُوڑی میں ’آپریشنل ڈیوٹی‘ کے دوران حوالدار انکت کمار پر مبینہ دراندازوں نے فائرنگ کی، جس سے وہ شدید زخمی ہوئے اور اسپتال منتقل کیے جاتے وقت دم توڑ گئے۔

اس سے ایک روز قبل اُوڑی سیکٹر میں ایل او سی کے قریب ایک جھڑپ میں سپاہی بنوتھ انِل کمار ہلاک ہوئے تھے۔ فوج نے یہ وضاحت نہیں کی کہ ان واقعات کے بعد مبینہ مسلح درانداز فرار ہونے میں کامیاب ہوئے یا نہیں، تاہم ترجمان کے مطابق اس سیکٹر میں کئی پوسٹوں کو جوابی کارروائی کا نشانہ بنایا جا رہا ہے اور علاقے کا محاصرہ کر کے حملہ آوروں کی تلاش جاری ہے۔

ادھر بدھ کے روز فوج نے اعلان کیا کہ ضلع کولگام کے جنگلاتی علاقے اکہال میں ڈیڑھ ہفتے سے جاری فوجی آپریشن ختم کر دیا گیا ہے۔ اس کارروائی میں دو فوجی ہلاک اور دس زخمی ہوئے، جب کہ فوج نے ایک عسکریت پسند کو ہلاک کرنے کا دعویٰ بھی کیا۔

واضح رہے کہ پانچ سال قبل بھارت اور پاکستان نے ایل او سی پر فائر بندی معاہدے پر سختی سے عمل درآمد کے لیے ایک اور سمجھوتہ کیا تھا۔ فوجیوں کی یہ تازہ ہلاکتیں ایل او سی کے قریب فروری میں ہونے والے آپریشن ’سندور‘ کے بعد پہلی بڑی جھڑپ سمجھی جا رہی ہیں۔