خیبرپختونخوا میں سیکورٹی فورسز کی کارروائیاں، 19 دہشت گرد ہلاک

راولپنڈی (ک م) سیکیورٹی فورسز نے خیبرپختونخوا میں 3 مختلف کارروائیاں کرتے ہوئے 19 خوراج دہشت گردوں کو ہلاک کردیا جب کہ آپریشنز کے دوران بہادری سے لڑتے ہوئے پاک فوج کے 3 جوان وطن پر قربان ہوگئے۔

پاکستانی فوج کے شعبہ تعلقات عامہ (آئی ایس پی آر) کے مطابق خیبرپختونخوا میں سیکیورٹی فورسز نے دہشت گردوں کے خلاف 3 مختلف کاررائیاں کیں، یہ کارروائیاں صوبائی دارالحکومت پشاور کے علاقے متنی، قبائلی ضلع مہمند کے علاقے بائیزئی اور ضلع کرک میں کی گئیں۔

ترجمان پاکستانی فوج نے بتایا کہ پشاور کے علاقے متنی آپریشن میں فتنہ الخوارج کے 8 دہشتگردوں کو ہلاک کیا گیا، مہمند بائیزئی آپریشن میں بھی 8 دہشت گرد مارے گئے، کرک آپریشن میں 3 خوارج دہشت گردوں کو جہنم واصل کیا گیا۔

آئی ایس پی آر کے مطابق ان کارروائیوں میں مجموعی طور پر 19 دہشت گرد ہلاک ہوئے۔

ترجمان پاک فوج کے مطابق فائرنگ کے تبادلے میں سکیورٹی فورسز کے تین جوان بھی وطن پر قربان ہوگئے۔

یاد رہے کہ گزشتہ ماہ کے آخر میں شمالی وزیرستان میں سیکیورٹی فورسز کے ساتھ فائرنگ کے تبادلے میں 2 کمانڈرز سمیت 9 دہشت گرد ہلاک اور 7 زخمی ہوگئے تھے۔