شام و اسرائیل کے درمیان براہِ راست رابطے، بحران کو ٹالنے کی کوششیں جاری

دمشق/یروشلم (ڈیلی اردو /رائٹرز)خبر رساں ادارے “رائٹرز” نے انکشاف کیا ہے کہ حالیہ ہفتوں کے دوران شام اور اسرائیل کے اعلیٰ سطحی حکام کے درمیان براہِ راست ملاقاتیں ہوئی ہیں۔ ان ملاقاتوں کا مقصد سرحدی علاقوں میں کشیدگی کو روکنا اور ممکنہ تصادم سے بچاؤ کے لیے راست اقدامات کرنا بتایا گیا ہے۔

رائٹرز نے پانچ باخبر ذرائع کے حوالے سے بتایا کہ دونوں ممالک نے کم از کم تین مرتبہ براہِ راست مذاکرات کیے، جن میں سے ایک ملاقات مبینہ طور پر سرحدی علاقے میں ہوئی۔ ذرائع کا کہنا ہے کہ ان مذاکرات کا مقصد خطے میں امن و استحکام قائم رکھنا اور کسی ممکنہ عسکری کشیدگی کو روکنا ہے۔

رپورٹ کے مطابق شامی وفد کی قیادت صوبہ السویداء کے سیکیورٹی سربراہ احمد الدالاتی نے کی، تاہم اسرائیلی وفد کے ارکان کے نام ظاہر نہیں کیے جا سکے۔ دو ذرائع نے دعویٰ کیا ہے کہ اسرائیلی جانب سے سیکیورٹی اداروں کے اعلیٰ حکام ان مذاکرات میں شریک ہوئے۔

اس سے قبل امریکی نشریاتی ادارے “سی این این” نے بھی رواں ماہ کے وسط میں رپورٹ کیا تھا کہ اسرائیل اور شامی حکومت کے درمیان حالیہ دنوں میں براہِ راست بات چیت ہوئی ہے، جو کہ دونوں ممالک کے درمیان عشروں پر محیط دشمنی کے تناظر میں ایک غیر معمولی پیشرفت سمجھی جا رہی ہے۔

سی این این کے مطابق یہ مذاکرات آذربائیجان میں منعقد ہوئے جن میں اسرائیلی فوج کی آپریشنز ڈویژن کے سربراہ عودید بسیوک نے شرکت کی، جب کہ شامی وفد کی ملاقات ترک حکام کی موجودگی میں ہوئی۔

دریں اثناء شامی صدر احمد الشرع نے رواں ماہ کے آغاز میں بیان دیا تھا کہ ان کی حکومت اسرائیل کے ساتھ بالواسطہ مذاکرات کر رہی ہے تاکہ شام پر اسرائیلی حملوں کو روکا جا سکے اور صورتحال اس نہج تک نہ پہنچے جہاں دونوں فریقین قابو کھو بیٹھیں۔