پشاور میں سکیورٹی فورسز کی گاڑی کے قریب دھماکا، دو اہلکار ہلاک، 7 اہلکاروں سمیت 11 افراد زخمی

پشاور (نمائندہ ڈیلی اردو) صوبہ خیبر پختونخوا کے صوبائی حکومت پشاور میں سکیورٹی فورسز کی گاڑی کے قریب دھماکے میں دو اہلکار ہلاک ہوگیا جبکہ 7 اہلکاروں سمیت 11 افراد زخمی ہوئے ہیں۔

پولیس کے مطابق ورسک روڈ پر ہونے والے دھماکے میں سکیورٹی فورسز کی گاڑی کو نشانہ بنایا گیا۔

ریسکیو ذرائع کے مطابق دھماکے میں دو سکیورٹی اہلکار ہلاک جبکہ فرنٹیئر کور کے 5 اہلکار اور 2 شہری زخمی ہوئے، جنہیں طبی امداد کیلئے لیڈی ریڈنگ ہسپتال منتقل کیا گیا ہے۔

لیڈی ریڈنگ یسپتال کی انتظامیہ کا کہنا ہے کہ ورسک روڈ دھماکے کے 9 زخمی ہسپتال لائےگئے، 2 زخمیوں کی حالت تشویشناک ہے۔

ایس پی ورسک نے بتایا کہ مچنی سے مہمند رائفل کی گاڑیاں پشاور آ رہی تھیں، ساڑھے 10 بجے مہمند رائفل کی گاڑی کو نشانہ بنایا گیا۔ جس کے نتیجے میں ایک اہلکار ہلاک اور دیگر اہلکار زخمی ہوئے ہیں۔ اس کے علاوہ دو سویلین بھی زخمی ہوئے ہیں۔

ان کا کہنا تھا کہ دھماکا خودکش نہیں، آئی ڈی بلاسٹ ہوا ہے. پہلے سے کوئی تھرٹ نہیں تھی، تحقیقات جاری ہیں۔

دوسری جانب پولیس اور بم ڈسپوزل سکواڈ کے اہلکاروں نے جائے وقوعہ کا محاصرہ کر کے شواہد اکٹھے کرنا شروع کر دیئے ہیں۔

دریں اثنا، کالعدم تحریک طالبان پاکستان (ٹی ٹی پی) نے ایک بیان میں حملے کی ذمہ داری قبول کی ہے۔

پاکستانی فوج کے شعبہ تعلقات عامہ (آئی ایس پی آر) سے جاری بیان میں کہا گیا کہ پشاور کے علاقے وارسک میں سیکیورٹی فورسز کے گاڑی پر بم دھماکے سے ایک اہلکار ہلالک اور 3 جوانوں سمیت 6 افراد زخمی ہوگئے۔

بیان میں کہا گیا کہ 11 ستمبر کو ضلع پشاور کے علاقے وارسک میں ریموٹ کنٹرول ڈیوائس (آئی ای ڈی) کا دھماکا ہوا۔

بیان میں کہا گیا کہ دھماکے کے نتیجے میں ضلع بنوں سے تعلق رکھنے والے 29 سالہ لانس نائیک عبدالرحمٰن ہلاک ہوگئے اور 3 اہلکار زخمی ہوئے۔

مزید بتایا گیا کہ دہشت گردی کے اس بزدلانہ عمل کے نتیجے میں 3 معصوم شہری بھی زخمی ہوگئے۔

آئی ایس پی آر نے بتایا کہ علاقے میں دہشت گردوں اور ان کے سہولت کاروں کے خاتمے کے لیے کارروائی کی جا رہی ہے۔

بیان میں کہا گیا کہ پاکستان کی مسلح افواج دہشت گردی کے ناسور کے خاتمے کے لیے پرعزم ہے اور ہمارے بہادر جوانوں کی اس طرح کی قربانیوں کے ساتھ ساتھ شہری ہمارے عزم کو مزید مضبوط بناتے ہیں۔